Guðmundur Fylkisson, Kominn heim frá Bosníu. http://gfylkis.myphotoalbum.com/

31. maí 2008. Lokabloggið hér, fluttur

Sat, 31 May 2008 22:57:29 GMT

Jæja, þá er komið að síðasta blogginu hér. Mér hefur tekist að koma bæði www.skraf.is og www.grjótaætt.is í gagnið og mun því verða meira þar héðan í frá.
Annars er það að frétta að ég er búinn að koma mér fyrir, kominn með kaffivél og sæti þannig að það er hægt að fara að kíkja í heimsókn. Stelpurnar hafa verið duglegar að vera hjá mér. Katla fer til Ísafjarðar 6. júní og verður fyrir vestan í sumar hjá Jóhönnu systur að passa og fleira. Katla er kominn með hamstur, Strump, og eins voru Hekla Margrét og Katrín Tekla komnar með hamstur, Bessa, en í dag var hann bara dáinn í bælinu sínu og var mikil sorg hjá þeim systrum vegna þessa. Lífið heldur samt áfram og ekki ólíklegt að annað dýr verði komið næstu daga eða vikur í hús í staðinn. Ég er búinn að kaupa borð og bekki í garðinni, því hann er stór og mikill og fljótlega verður stóra grillið sett upp út í garði. Katrín Tekla bað mig, síðasta sunnudag, 25. maí. að taka hjálpardekkin af hjólinu því hún vildi byrja að æfa sig. Það var að sjálfsögðu gert og hún hjólar nú eins og hjóladrottning síðan, þurfti ekki neina aðstoð við að koma sér af stað. N.k. þiðjudag þá er stefnt að því að ég verði með fyrirlestur hjá Rotary á Selfossi um Bosníu. Annars er það að frétta úr lögreglufriðargæslunni að Þórhallur Árnason er farinn til Bosníu í staðinn fyrir mig, fór loksins á fimmtudag. Síðan eru 2 lögreglumenn á leiðinni til Liberiu í Afríku nú í júní og verða þar í ár. Það eru Jói Sigfúsar á Akureyri og Helga Einars í Keflavík.
Ég þakka bara fyrir samfylgdina hér og vonandi ,,sé" ég ykkur á nýju svæðunum mínum, eða bara í kaffi eða grilli heima. G.F

24. apríl, eitt og annað,

Thu, 24 Apr 2008 02:19:32 GMT

Lífið er svo sem að komast í ákveðinn farveg. Ég í vinnunni en heldur er minni aukavinnan en áður. Annir í vinnunni samt meiri en áður en ég fór út. Aðeins í vandræðum með næturvaktirnar en þetta ætti að venjast á nokkrum vikum. Stelpurnar hafa verið talsvert hjá mér og Katla er farin að sofa í herberginu sínu. Í nótt var hún með 2 vinkonur í gistingu. Hún lenti í því í gær að hjólinu hennar var stolið fyrir utan heima, þ.e. þegar hún ætlaði á því í skólann í morgun var búið að stela því. Við höfum leitað í nágrenninu en ekki fundið það. Þetta er rautt Schwinn Frontier 21 gíra hjól. Hjólið mitt og Katrínar og hjól Heklu voru óhreyfð. Bensínhákurinn fær að standa að mestu og ég fer um á hjólinu. Ég er búinn að skipta um vatnsdælu og vatnslás, það er búið að stilla hann og eins fékk ég mér nýjan stóran rafgeymi. Hitarinn virkar vel, mikill munur að koma svona út í heitan bíl þegar kalt er úti. Hann verður heitur á um 30 mínútum. Hekla hefur verið að æfa handbolta og það verður handboltamót hjá henni um helgina, þ.e. á sunnudag. Hún var með danssýningu á dögunum og eru komnar myndir frá því á myndasíðuna. Eins eru það nýjar myndir af hrafnshreiðri sem ég ætla aðeins að fylgjast með, svo og af hjólafélögunum á vaktinni minni. Við erum allir 4 á hjólum og stefnum að því að fara í einhverja hjólaferðir í sumar saman. Mamma flytur væntanlega í byrjun maí í Kópavog. Ég þarf að fara að setja upp veðurstöðina mína og koma henni á netið aftur, þ.e. þegar mér tekst að gera skraf.is og grjótaætt.is nothæft.

9. apríl. Fyrsti vinnudagurinn

Wed, 09 Apr 2008 22:20:44 GMT

Fyrsti vinnudagurinn heima var í dag. Ég hafði farið með bílinn á verkstæði í gær, til að láta setja í hann hitarann, og ætlaði á mótorhjólinu í vinnuna í morgun. Þegar ég síðan vaknaði var allt hvítt og rúmlega það. Í gærkvöldi fór ég reyndar, ásamt Reyni Hauks, vini mínum sem býr í Bandaríkjunum, í heimsókn til sameiginlegs vinafólks. Við létum ekki vita af okkur og birtumst bara, gerðum reyndar það sama fyrir rúmlega ári þegar það hittist svo á að við komum báðir til landsins á sama tíma. Þegar ég kom svo heim í gærkvöldi var byrjað að snjóa en ég bjóst ekki við að það yrði neitt að ráði. Ég varð því að fara með strætó í vinnuna. Þegar ég mætti var allt á hvolfi, umferðarslys á Reykjanesbraut og brautin því lokuð og rétt eftir að við mættum var svo annað slys á Kjalarnesi. Dagurinn byrjaði því með látum og fram á hádegi var nóg að gera í svipuðum málum annars staðar á landinu. Dagurinn var síðan rólegur eftir hádegi. Ég náði svo í bílinn seinnipartinn. Mikill munur að vera með svona fjarstýrða miðstöð. Hún er þannig að maður getur kveikt á henni og gengur hún þá í klukkutíma. Eins getur maður stillt hana á brottfaratíma og reiknar hún þá út miðað við hitastig hvenær hún þurfi að fara í gang, hentar því vel á morgnana þegar maður á að mæta í vinnu. Gengur fyrir dísil og get ég notað litaða olíu því þetta er sjálfstætt apparat. Lára á afmæli í dag og Elín á afmæli á morgun. Katrín keypti afmælisgjöf handa mömmu sinni á Ísafirði og bíður væntanlega eftir að fá að afhenda henni gjöfina. Jæja, nóg í bili, er enn að berjast í því að koma www.skraf.is á koppinn sem skrafsíðu minni og eins www.grjótaætt.is til að halda utan um Grjótaættarupplýsingar. Bæði þessi lén orðin virk en mér gengur illa að komast inn til að breyta upplýsingum. Kvitta takk.

1. apríl. Ekkert aprílgabb

Tue, 01 Apr 2008 19:06:50 GMT

Hekla Margrét hefur nánast verið hjá mér síðan ég kom til landsins, hún var reyndar ekki um helgina, þær voru þá allar hjá Elínu. Katrín hefur svo verið að skiptast á. Katla bíður eftir því að ég klári herbergið hennar en það mjakast. Ég hef verið að dunda mér við að koma Range Rover í almennilegt horf. Fór með hann í smurningu og komst að því að olían sem var á honum var ónýt, skipti um loftsíu og setti í hann K/N síu til að spara bensín. Næsta þriðjudag fer svo Webasto miðstöðin í bílinn. Þetta er dísilmiðstöð en bíllinn er bensínbíll Ég mun því setja í hann lítinn tank og setja litaða olíu í hann til að keyra miðstöðina. Ég ætti að vera löglegur þannig og eins hagkvæmur. Ég fór í fýlu með Landssamband lögreglumanna. Ég er í varastjórn LL og stefndi á að fara í aðalstjórn á þessu ári til að taka þátt í kjarasamningum í haust. Síðan fékk ég bréf, atkvæðaseðil, þar sem kjósa átti um tvo lista til stjórnar LL og var ég á hvorugum. Auðvitað á ég einhverja sök í þessu máli, þ.e. að hafa ekki passað sjálfur upp á þetta, en ég var jú úti og fylgdist ekki nógu vel með því sem var að gerast og ekki leituðu þeir til mín, hvorugur hópurinn. Ég skilaði því auðu. Ætli ég segji mig ekki frá störfum í þágu LL hér eftir, þarf að hugsa málið. Á fimmtudag fer ég síðan vestur með pabba og Láru og ætlar hún Katrín að koma með. Katla og Hekla vildu líka fara en það er ekki í boði fyrir þá sem eru í skóla. Við ætlum að tæma Fjarðarstræti 15, þrífa og koma suður með það sem eftir er. Pabbi tók á leigu sendibíl sem við förum með vestur. Við komum svo væntanlega suður á sunnudag. Kannski ég reyni að kíkja aðeins á stöðina á Ísafirði og hitta á bæjaryfirvöld en ég get líklega upplýst það hér og nú að ég mun aðstoða 112 við uppbyggingu á þeirra þætti stjórnstöðvar á Ísafirði. Hugmyndir eru uppi um að koma í sama hús lögreglu, slökkviliði og björgunarsveitum og setja þar meðal annars upp stjórnstöð. Þórhallur hjá 112 bað mig að koma að þessu fyrir þá. Það er ekki ljóst hvenær þetta verður tímabundið aðalstarf en afstaða RLS er að ég geti ekki sinnt þessu með starfinu á FML, ég þurfi að fara í launalaust leyfi.
Kvitta svo takk, nóg er af fólki sem ,,kíkir" inn á síðuna en fáir kvitta.

27. mars. Löggiltur húseigandi.

Thu, 27 Mar 2008 17:41:26 GMT

Í morgun kl. 11.00 gekk ég frá lokagreiðslunni og skrifað var undir afsal vegna Norðurbrautar. Annars hef ég aðallega verið í því að átta mig á því að ég er kominn heim, ganga frá nokkrum lausum endum, kaupa bíl og selja bíl, sækja mótorhjólið til Fríðu, varð að leysa það út með rauðvíni frá Trebinje klaustrinu. Síðan fórum við Katrín og keyptum okkur reiðhjól, ég fékk mér ,,götuhjól" og keypti síðan tengihjól fyrir Katrínu þannig að við getum farið saman út að hjóla og ég ráðið ferð og hraða. Hún þjálfast þá einnig upp í jafnvæginu á hjóli án hjálpardekkja því auðvitað er stefnt að því að sleppa þeim í vor eða sumar. Ég fór inn í vinnu til að tryggja að ég hafi þann aðgang sem ég þarf þegar ég byrja að vinna, fá nýja einkennisfatnaðinn og fleira vinnutengt. Reyndar lendi ég í því að þurfa að nota hluta af búningnum sem ég notaði í Bosníu fyrstu vikurnar, það var ekki allt til fyrir mig, reyndar það eina sem var til var úlpa og sokkar. Ég ræddi aðeins við mann sem hafði leitað til mín með að sjá um ákveðið verkefni og þarf að ræða það mál betur áður en ég fer að segja frá því hér. Um verður að ræða tímabundið verkefni sem ég reyni að sinna í fyrstu með lögreglustarfinu og síðan þarf ég hugsanlega að fara í leyfi til að sinna því í fullu starfi, tímabundið. Í gær fór Katrín í 5 ára skoðun / þroskapróf og stóðst það með sóma. Á morgun fer ég síðan á stutt námskeið í myndvinnslu og í framhaldi tek ég við stórum bleksprautu prentara með búnaði til að prenta stórar myndir, teikningar og á striga. Það verður í boði fyrir ættingja, vini og kunningja. Einn kunninginn er að flytja til útlanda og vantar einhvern til að taka við þessu tæki og sjá um það og auðvitað er dót fyrir stráka alltaf freystandi. Á laugardag er svo 5 ára afmæli Katrínar og um kvöldið fer ég á árshátíð STRÖGL. Það er svo kalt að ég er búinn að panta tíma fyrir ísetningu á Webasto miðstöðinni í nýja bílinn, ekki veitir af meðan eldsneytisverðið er jafnhátt og það er. Það ætti að skila sér í 2-3 lítra sparnaði. Ég hef sett nokkrar myndir á vefalbúmið hjá mér, bætti bara í fyrri albúm. Ég verð heimavinnandi næstu viku, byrja á vakt miðvikudag í þar næstu viku. Það er lítið mál að skella á könnuna ef einhver kíkir í heimsókn, er í því að koma herbergi Kötlu í stand og koma því sem er þar í geymslu, í aðra geymslu. Hún þráir að fá herbergið sitt.
Kvitta svo takk.

21. mars. Egils appelsín og æði, farangur hvað.

Fri, 21 Mar 2008 20:09:59 GMT

Auðvitað gekk þetta ekki eðlilega fyrir sig. Ég var vaknaður klukkan 06.00 í gærmorgun, gekk frá íbúðinn og kom farangrinum út í bíl og mætti svo í vinnuna kl. 08.00. Þar mætti ég á morgunfund hjá fyrrum SIPA deildinni minn og þar fékk ég enn einn plattann. Ég erindaðist síðan nokkuð, kláraði útskráninguna og fékk mér hádegismat. Eftir mat fékk ég Donald Kerr, kanadamann, til að skutla mér út á flugvöll. Ég lét vigta farangurinn, 160 kg. og greiddi 1350 evrur eða 170.000 kr. fyrir yfirvigtina. Síðan var ég með tölvutöskuna og handtösku. Ég skráði mig síðan inn og var starfsfólkið ánægt að ég skildi vera svona snemma á ferðinni. Síðan fór ég upp næstu hæð þar sem er veitingastaður og beið. Það komu 3 félagar til að kveðja mig þar. Um morguninn var sól og blíða en þegar fór að líða að flugi var komin snjókoma og þoka. Vélin fór svo í loftið, smá seinkun. Við lentum svo í Vín um það leiti sem vélin mín til Kaupmannahafnar átti að fara í loftið en þar var smá seinkun einnig og náði ég um borð, var þó ekki viss um farangurinn. Þegar ég síðan lenti í Köben þá þurfti ég að skrá mig inn í flugið heim, var með E miða og fannst ekki flugmiðinn tengdur honum. Það tók um klukkutíma að leysa það mál. Á meðan gekk sérsveitin í gegn og fór með 20.00 vélinni frá Köben heim og eins hún Anna frá Friðargæslunni. Ég fór að fá mér kvöldmat og heyrði kunnuglega rödd á næsta borði, þar var Sigríður Björk, fyrrum lögreglustjóri á Ísafirði, núverandi vararíkislögreglustjóri, ásamt börnum og móður sinni. Við fórum svo í loftið á réttum tíma og síðan lent á Íslandi rétt eftir miðnætti. Ég fór í gegnum Fríhöfnina og síðan að farangursbandinu. 2 töskur skiluðu sér en ekkert meir, meðan ég var að bíða kom einn tollarinn, sem þekkti mig, og sagði að þeir væru búnir að bíða eftir mér síðan 22.00 en þá hefði farangurinn minn komið og þeir töldu að ég kæmi með sama flugi. Það má nefnilega ekki senda farangur án farþega eins og gert var í þessu tilfelli. Þarna reyndust vera plastkisturnar 3 en eina töskuna vantaði enn. Ég þurfti náttúrulega að gera skýrslu á það og fannst taskan í kerfinu, enn í Vín. Ég gekk síðan frá greiðslu gjalda vegna þess sem ég þurfti að greiða af og fyrir utan biðu svo mamma, Hekla Margrét, pabbi og Lára. Það var eins gott því farangurinn varð að fara í 2 bíla. Síðan fór ég heim og svaf í fyrsta skiptið á Norðurbrautinni í nótt. Katrín hringdi svo um 9 og fór ég og sótti hana. Hef síðan verið að taka upp úr töskum í dag, fórum reyndar í Húsdýragarðinn yfir miðjan dag en síðdegis skilaði svo síðasta taskan sér. Fórum í kaffi á Breiðvang 19. Mikið er gott að vera kominn heim, búinn að fá mér Egils appelsín og æði. Á morgun er það svo sund, brúðkaup og eitthvað fleira.
Kvitta takk.

19. apríl, marga að kveðja, margt að þiggja og eitt og annað að gefa. 1

Wed, 19 Mar 2008 21:05:46 GMT

Var mættur í vinnuna rétt um hálf átta, mætti á fyrsta kveðjufundinn kl. 09.00. með starfsfólki varalögreglustjórans. Þar var mér afhent hólbréf frá honum og fylgdu með þau orð að það væri kannski 4 eða 5 sem fengju slíkt bréf á ári. VIð erum með 180 alþjóðastarfsmenn og heildarstarfsmannafjöldinn er rétt rúmlega 400. Eftir að hafa hlustað á lofræðu og tekið við bréfinu var smá myndataka og síðan var næsti fundur. Það var síðasti skipulagsfundur í starfshópi sem hefur með baraáttuna gegn skipulagðri glæpastarfsemi. Það var farið yfir árangurinn á því ári sem þessi skipulagshópur hefur verið við störf. 60 einstaklingar hafa verið dæmdir í samanlagt 200 ára fangelsi, ekki svo sem langir dómar en árangur samt. Að loknum fundinum var mér síðan afhentur skjöldur frá Frönsku Gendarmarie með þakkaráletrun. Ég fór svo á milli aðila til að fá kvitt á lokaskýrslu, þetta er útskráningarform, þarf að skila búnaði, skilríkjum, borga reikninga og fleira. Ég fór svo með 2 aðila inn í Butmir og þurfti að koma aðgangskorta umsókn inn í kerfið þar, aðkallandi mál. Það hitti ég á yfirmann Greiningardeildarinnar og afhenti hann mér tréplatta með mynd og áletrun. Ég fór einnig og kvaddi lögreglustjórann okkar, Coppola og afhenti hann mér kristalskubb með merki Carabineri, síðan voru aðrir ítalir sem ég hef verið að vinna með sem gáfu mér málmplatta sem er að jafnaði ekki afhentur öðrum en Carabineri lögreglumönnum í Mission. 3 heimamenn gáfu mér síðan bol og veski. Ég er því aftur kominn í vandræði með farangurinn minn og á meira að segja von á fimmta plattanum á morgun. Ég er mjög ánægður, þetta sýnir mér allavega að fólk er ánægt með störf mín. Verst að ég þarf að borga helling yfirvigt bara fyrir þessa hluti og ekki hefur evran verið að lækka. Jæja, þarf að pakka rest niður, er búinn að henda helling, gefa helling og svo er að koma sér í ból. Fer í loftið um miðjan dag, flýg til Vín, síðan til Köben og loks heim, verð á Íslandi rétt eftir miðnætti.
Kvitta takk

18. mars. Nú er svart, allt orðið hvítt, 2

Tue, 18 Mar 2008 18:35:46 GMT

Andskoti er eritt að klára að pakka. Ég fór í kvöldmatarboð í gærkvöldi, ítalskur félagi minn vildi bjóða mér í ítalskan kvöldmat og fór ég að sjálfsögðu. Haldiði ekki að helv.... litli BMW eigandinn hafi verið þar líka. Hann sagði reyndar þegar hann sá mig að hefði hann vitað þá hefði hann ekki komið. Hann sagðist hafa það á tilfinningunni að mér líkaði ekki við hann. Ég sagði það rétt vera og útskýrði af hverju. Jæja,að sjálfsögðu pastaréttir og var ég því með ,,þungan" maga þegar ég fór að sofa. Var svo að sjálfsögðu mættur snemma vinnu í morgun, kláraði skýrsluna um ferðina í gær og tók svo til á skrifstofunni og gekk frá mínum málum þar. Þurfti svo að sjalfsögðu að sinna vinnuerindum yfir daginn þó svo að síðustu þrír dagarnir eigi að vera ,,utan vinnu'´, við að útskrá sig. Um miðjan dag fór svo að snjóa. Ég fékk svör frá tollinum og veit af hverju ég þarf að greiða gjöld og hve há, veit hvað telst búslóð og hvað ekki. Ég mun svo nota það sem eftir lifir kvölds til að klára að pakka niður, nema það allra nauðsynlegasta.
Kvitta takk.

17. mars. Rigning, sól og blíða, úrhelli, þrumur og eldingar. 3

Mon, 17 Mar 2008 17:48:43 GMT

Ég var farinn að vinna kl. 06.0 í morgun, ég og Dejan, túlkurinn minn, fórum til Doboj og vorum komnir þangað rétt fyrir klukkan 9. Þegar við fórum af stað þá var talsverð rigning en eftir því sem norðar dró þá birti til. Við hittum á 2 menn hjá rannsóknarlögreglunni í Doboj og skoðuðum hjá þeim fingrafaratölvu og annað tækjabúnað. Þeir höfðu ekki yfir miklu að kvarta, þó helst yfir netsambandinu en það eru 28 fingrafaratölvur samtengdar í landinu. Eftir Doboj héldum við til Zenica og hittum á aðra 2 þar, annar þeirra reyndar kona. Þau höfðu aðeins fleiri vandamál en voru samt ánægð með tölvuna. Loks héldum við til Travnik og Guðlaug, ég lagði inn gott orð fyrir ykkur fólkið á fjallinu og nú er spurning hvort þú þekkir einhverja mynd í nýjasta myndaalbúminu mínu. Hjá þessari rannsóknardeild voru fleiri vandamál en lausnir en stór hluti af því var stjórnunarlegs eðlis. Við vorum svo komnir heim til Sarajevo um 17.00. Það skall síðan á úrhelli með tilheyrandi þrumum og eldingum. Í kvöld er svo kveðjukvöldverður. Einn ítalskur félagi minn bauð mér í ítalskan kvöldmat í kvöld. Ég hringdi svo í Katrínu en hún er komin í Páskafrí en fór samt í fimleika í dag með leikskólanum. Hún var svo bara heima að leika sér Hún sagði mér að það væru þrír dagar þar til ég kæmi heim. Ég borðaði hádegismat á veitingastað í Zenica og mæli heils hugar með honum við þá sem eiga leið um borgina. Staðurinn heitir Dubrovnik. Ég borðaði þar kálfakjöt með rækjum, hunangssteikt.

Jóna Björg. Þetta er heilagt rauðvín, bruggað af munkum í klaustri.
Ég er farinn að hafa áhyggjur af evrunni. Hlutur sem ég keypti í haust og þarf að borga gjöld af hefur hækkað um 30.000 kr. og gjöldin miðast víst við gengið þegar ég kem heim. Er hræddur um að ef evran hækkar meira þá taki ég þennan hlut ekki með heim.
Kvitta takk.

16. mars. Blakhelgi í góðu veðri 4

Sun, 16 Mar 2008 19:50:55 GMT

Ég fór í St. Patrekspartýið á föstudagskvöld en stoppaði reyndar ekki lengi. Samkvæmið haldið á öðrum stað en í fyrra og líklega aðeins um helmngur núna miðað við í fyrra. Ég mætti svo fyrir klukkan 10 inn í Butmir til að aðstoða við blakkeppina en komst þá að því að hún byrjaði ekki fyrr en 14.00. Jæja, var þar allan daginn og fram á kvöld og kíkti svo á St. Patrekspartý inn í Butmir um kvöldið. Sem fyrr, fór snemma heim og var því vaknaður snemma í morgun. Blakið byrjaði kl. 10.00 og því lauk núna kl. 19.30. Ég heyrði í Kötlu í gær, hún var þá að bíða eftir því að fara vestur en eitthvað hafði systir mín ruglast þegar hún pantaði far fyrir hana, pantaði frá Ísafirði og síðan til Ísafjarðar. Það var svo lagað en þegar hún svo fór vestur seinni partinn í gær þá fór farangurinn hennar einhverra hluta vegna á Egilsstaði. Áðan talaði ég við Heklu á MSN, hún var að prófa nýju fartölvuna sýna og notuðum við vefmyndavélina. Gaman að sjá hana svona í mynd. Ég hringdi svo í Katrínu og lá vel á henni. Hún segist líka komin í Páskafrí eins og hinir en ætlar samt að fara á morgun í fimleika með leikskólanum. Hún gisti hjá ömmu Möggu og afa Lulla yfir helgina. Á morgun er svo ferðalag hjá mér vegna vinnunnar, ég reyndar litinn hornauga vegna þessa. Flestir eru hættir að vinna viku fyrir heimferð, við eigum þrjá daga til að nota í ,,útskráningu" en ég ætla að reyna að sleppa með einn, þ.e. miðvikudaginn. Ég þarf að skrifa skýrslu á þriðjudag, um ferðina á morgun, síðan er reyndar fundur á miðvikudagsmorgun sem ég hef lofað að mæta á en síðan fer ég í útskráninguna. Ég þarf að fá uppáskrift hjá húseigandanum að ég skuldi honum ekkert, ég þarf að skila tölvu, síma og ökuskírteini og loks þarf ég að skila lögregluskilríkjunum. Ég ætla nú reyndar að reyna að fá að halda aðgangskortinu að Butmir, svona upp á minjagildið.
Kvitta takk. Ekki búast við bloggi fyrr en seint á morgun, veit ekki alveg hvenær ég verð kominn heim.

14. mars. Meira dót, meiri yfirvigt 6

Fri, 14 Mar 2008 18:05:31 GMT

Ég kvaddi blakfélaga mína í gærkvöld og í dag var ég kvaddur á tveimur stöðum hjá EUFOR. Annars vegar á vikulegum fundi með yfirstjórn EUFOR / BUTMIR og síðan í stjórnstöðinni síðar um daginn. Félagarnir þar gáfu með áritaðan skjöld og voru með skemmtilega glæru á skjávarpanum. Eftir vinnu var svo ,,happy hour" já aðgerðarhlutanum hjá EUFOR og leit ég aðeins við þar. Í kvöld er svo St. Patrekspartý inn í borg. Á mánudag fer ég til þriggja staða til að skoða fingrafaratölvubúnað og síðan tækjabúnað rannsóknadeilda lögreglu. Þetta eru Travnik, Doboj og Zenica. Þetta verður langur dagur því við byrjum klukkan 6 um morgunin og byrjum á Doboj. Þangað er rétt rúmlega tveggja tíma akstur. Veðrið hefur verið að gleðja og svekkja okkur. Það er næturfrost en um leið og sólin skín þá fer hitastigið í 15-18 gráður. Nágrannar mínir urðu enn einu sinni fyrir barðinu á þjófum síðustu nótt. Ég vaknaði ekki við lætin en þjófar komu og stálu einu kopar niðurfallsröri og reyndu að stela öðru. Það voru víst talsvert læti þegar þeir gerðu þetta en ég vaknaði ekki en flestir aðrir í hverfinu. Um síðustu helgi var loki af rafmagnsinntakinu stolið á hinu húsinu líka. Ég verð í því að klára að pakka um helgina og eins verð ég dómari og aðstoðardómari í blakkeppni inn í Butmir.
Kvitta takk.

13. mars. Kveðjugjöf kostar 1000 kall í yfirvigt 7

Thu, 13 Mar 2008 20:48:44 GMT

Þetta verður stutt í dag. Ég fór út með deildinni, sem ég tilheyri í skipuritinu, í kveðjuhádegisverð. Þar var mér færð bók að gjöf frá þeim og hún kostar mig rúmlega 1000 kall í yfirvigt. Þetta er stór og mikil bók með fullt af myndum frá fyrri tíð. Síðan beið okkar Olgu verkefni en við höfum verið að reyna að þrýsta í gegn að EUFOR klári umsóknir sem eru að verða tveggja mánaða gamlar. Ein af umsóknum er fyrir staðgengil Olgu en til þess þarf öryggisheimild. Við vorum búin að fá hana en það var ekki réttur stimpill á henni og þurfum við að reyna að bjarga því á morgun. Olga er farin í frí, ég verð tiltækur fram á miðvikudag en þá verður þessi að geta tekið við. Síðan var það blakið núna í kvöld. Auðvitað þurfti ég að kaupa eina tösku í viðbót en það þýðir ekki að ég geti verslað meira, það er bara óþarfi að vera að troða í töskur.
Kvitta takk.
p.s. Ingvar, það verður ekkert dregið undan hjá mér á listanum til Tollsins, ég borga það sem ég þarf að borga.

12. mars. Skammarkrókurinn, 8

Wed, 12 Mar 2008 18:37:33 GMT

Það var sól og blíða í dag og hitinn fór langt upp í 20 gráður. Það á að vera þokkalegt veður fram á sunnudag en þá á það að breytast eitthvað aðeins. Dagurinn í dag með hefðbundu sniði í vinnunni, við í fylgdarstarfi og svo á fundum. Ég, reyndar eins og margir fleiri, hef ekki verið sáttur við tölvupósta sem virðast vera sendir á alla eftir einhverju tímaplani, eða skapi sendandans. Það er verið að skammast út í allt og alla og er alhæft, klárlega ranglega. Ég hef því sett inn í Out of office í tölvupóstinum mínum að ég sé utan skrifstofunnar, ekki að finna í kaffistofunni, ekki við vatnstanka, ekki reykjandi í bílnum, deili bíl með öðrum, geri hann kannski skítugan en fari þá með hann í þvott, fylli hann af eldsneyti og skili kvittunum inn í þar til gert box og fleira í þessum dúr. Þetta fór eitthvað fyrir brjóstið á yfirmönnum í dag og ég endaði í skammarkróknum. Sem betur fer var ég búinn að kvitta fyrir umsögninni og eins yfirmaður minn. Ekki það, ég er ekki viss um að ég hefði fengið öðru vísi umsögn. Það var ágætur félagi minn sem vinnur á skrifstofu lögreglustjórans sem hringdi í mig og bað mig vinsamlegast að breyta þessu og í framhaldi fékk ég nokkra tölvupósta frá hinum og þessum. Ég að sjálfsögðu búinn að breyta þessu og senda afsökunarbeiðni á ákveðna aðila, en þó með þeim orðum að ég fagni því að menn beini sjónum sínum að þeim sem skapar vanda í stað þess að skammast í öllum og vona að þetta verði til framtíðar. Það verður svo gaman að sjá á morgun hvort það verður eitthvað framhald. Eftir vinnu fór ég að sjálfsögðu beint heim að halda áfram að pakka. Búinn að pakka niður í eina ferðatösku og eina plastkistu. Á aðra ferðatösku eftir, aðra plastkistu og svo handfarangurstöskuna. Ég hef komið sjálfum mér á óvart hvað ég hef verið duglegur að henda hlutum en það verður gaman að sjá hve fljót ég sé fötin mín utan á einhverjum hér í nágrenninu. Eftir morgundaginn get ég formlega farið að telja niður, þ.e. síðast föstudagurinn hér og svo framvegis. Ég fer í loftið um miðjan dag næsta fimmtudag, flýg til Vínar og þaðan til Köben og svo heim. Er heima rétt eftir miðnætti. Pabbi eitthvað að velta því fyrir sér hvort hann þurfi að mæta með kerru á flugvöllinn til að sækja mig en mamma kemur til með að sækja mig og væntanlega Hekla með henni. Það er svo fínt fyrir mig að hafa mömmu heima hjá mér, Páskamaturinn og allt það og við leysum einhvern veginn úr plásmálum þar til hún fær íbúð. Ég fékk í dag Rotary fána Sarajevo fyrir pabba og hann á ég víst að afhenda á Rotaryfundi á Selfossi einhvern tíma í vor þegar ég verð með kynningu á dvölinni minni hér. Ég þarf að sjálfsögðu að fá leyfi hjá Ingibjörgu Sólrúnu fyrst.
Kvitta svo. P.s. það er ekki hægt að ,,panta" fleira frá Sarajevo, ég hef ekki meira pláss.

11. mars. Með bros á vör 9

Tue, 11 Mar 2008 20:35:21 GMT

Ég skellti mér út að borða í gærkvöldi. Ég fór með hluta af SIPA deildinni á Park Prinsave, staðinn sem hún Katla mín naut þess að fá piparsteik í tvö skipti. Ég fékk mér reyndar kjúkling í gráðostasósu. Þar sem ég var bíllaus fór ég með sporvagni inn í borg og tók síðan leigubíl upp í hlíðina, að veitingastaðnum. Ég fékk svo skutl heim á eftir. Í morgun fékk ég uppkast að mati yfirmanns míns á störfum mínum og get ég ekki annað en verið ánægður með umsögnina sem ég fékk, ég þarf að kvitta fyrir þessu á morgun og fer þetta svo til starfsmannahalds. Ég fæ þetta svo afhent áður en ég fer heim. Ég var svo í fylgdarstörfum í dag, 3 fundir og svo blakið í kvöld. Eitt af því sem við Olga höfum verið að gera er að leiða saman menn frá ólíkum deildum sem virðast vera að vinna að sama málinu hver í sínu horni. Þeir hafa verið að leita til okkar eftir upplýsingum og var það eina skynsamlega í stöðunni að láta þessa aðila tala saman, án þess að tala í gegnum okkur. Eitt af því sem um ræðir er leit að öfgahópum múslíma en fjölmiðlar hafa verið að fjalla um að hér í Bosníu séu á milli 100 og 400 000 þúsund Wahabi en það eru öfgasinnarnir og séu þeir í ,,sofandi" deildum, tilbúnir til að láta að sér kveða. Ég hef einnig verið að vinna að áframhaldi á tæknirannsóknarstofu vinnunni og er það eitt af því sem mér er hrósað fyrir, að hafa viljað bæta á mig vinnu svona í lokin. Ég er búinn að setja mig í samband við tollinn á Keflavíkurflugvelli og leita eftir því að fá að senda á undan mér lista yfir það sem ég er með og þarf að greiða af svo ég þurfi nú ekki að verja of löngum tíma í tollafgreiðslu. Eitt af því sem ég er með er Webasto hitari fyrir bílinn, en þetta hafði ég keypt og ætlað að setja í helv... BMW inn áður en ég kæmi heim. Þetta kemur sér svo sem vel í hvaða bíl sem er, sér í lagi þegar eldsneytisverðið er eins hátt og það er. Ég heyrði í stelpunum í kvöld og er hún Katrín alveg með það á hreinu hvað eru margir dagar eftir og Katla er orðin mjög spennt en hún fer vestur á Ísafjörð á laugardag og verður yfir Páskana. Ég hvatti hana tl að þiggja boð Jóhönnu systir þó þetta yrði til þess að við myndu hittast aðeins síðar, ég er jú að koma alkominn heim og nokkrir dagar til eða frá skipta ekki stóru máli. Hún er upp með sér að fá að vera barnapía og ekki ólíklegt að hún verði eitthvað fyrir vestan í sumar einnig.
Kvitta takk.

10. mars. Fortíðardraugurinn. 10

Mon, 10 Mar 2008 17:37:55 GMT

Það lá vel á krökkunum í gærkvöldi. Illugi hefur minnkað við sig vinnu og er núna bara í einni vinnu með skólanum. Systurnar gisti hjá ömmu Möggu og afa Lulla í fyrrinótt og aðstoðuð svo við að passa hann Kára Hrafn litla frænda sinn. Þær fengu einnig ömmu Möggu til að prófa að baka pönnukökur, bara til að sjá hvort hún kynni það enn svo hún gæi nú bakað fyrir mig þegar ég kem heim. Af því að ég sofnaði snemma þá vaknaði ég að sjálfsögðu snemma. Vinnan með aðeins öðrum hætti þessa dagana því ég er að reyna að einbeita mér að því að koma tengiliðastarfinu yfir á Olgu og sinna sérverkefninu varðandi tæknirannsóknarstofur. Sótti í dag 2 fundi vegna þess, annan þar sem farið var fyrir fingrafarasamburðartölvubúnað og eins DNA rannsóknarstofuna. Það eru fingrafaratölvur á nokkrum stöðum á landinu en vega innbirðis deilna þá eru þær ekki rétt notaðar, menn eru að senda fingraför yfir lækinn í sumum tilfellum. Hinn fundurinn fallaði um laga hliðina en þar erum við að glíma við fortíðardraug. Þegar stríðinu lauk þá fór alþjóðlegi lögregluhlutinn hér í að kanna með lögreglumenn og samþykktu þá eða höfnuðu og eins gerðist það að ekki voru teknar ákvarðanir með einhvern hópinn. Núna er deilt um það hvort t.d. tæknirannsóknastofu fólk eigi að vera lögreglumenn, þurfi lögreglumenntun og eða eigi að vera óbreyttir starfsmenn með lögreglustöðuheiti. Síðan var það stöðufundur að venju kl. 17.00. Guðlaug og dóttir, rangt Vlas. Þetta var Vlasenica en ekki Vlasic og því voru húsin ykkar ekki í Pólskri gæslu en þeir gátu loksins flaugið þyrlunni heim í gær. Eftir stöðufundinn, þegar við komum út, voru skýin og birtan að leik og náði ég að festa eitthvað af því á mynd. Á morgun er svo líklega Rotary fundur, ég þarf að afhenda fána fyrir pabba og líklega reyni ég að fá fána héðan til að afhenda honum. Hann spurði mig svo að því í dag hvort ég hefði verið í meiri lífshættu hér eða í Atlanta á sínum tíma. Því verður svarað síðar.
Kvitta takk.